Luk 12 | TVK | STEP | E melele nen tak, moletin xil di labe holu xa labe holu, e dit lating lamei tengan xa lapus Iesu. Xil dit lapel xat le xil. E Iesu misepin diamu mi moletin nan xil bitene, “Muketeh kuhi ve pispisien xil na Parasi xil xa labe vat luvosen tang. Nggoni is xa pol ni pulaoa mikaio, pispisien nae di purun xuxus ni nenemien na moletin xil.

Luke 12

Iesu Misel Xat Moletin Xil ve Sexien na Parasi Xil

Luk 12:1-3

1 E melele nen tak, moletin xil di labe holu xa labe holu, e dit lating lamei tengan xa lapus Iesu. Xil dit lapel xat le xil. E Iesu misepin diamu mi moletin nan xil bitene, “Muketeh kuhi ve pispisien xil na Parasi xil xa labe vat luvosen tang. Nggoni is xa pol ni pulaoa mikaio, pispisien nae di purun xuxus ni nenemien na moletin xil. 2 E neta xa mukutaxole, Hi ital rati imei valkesao. E neta xa moletin misak pisi di misoso ni, Hi isak ni istal imei kesao tengan moletin sav xil ti lipusi. 3 Holesok xil xa di musepin ni e ut te maluxoluk, veter mu, moletin sav xil mei lilonge e melengien tang. E holesok xil xa moletin di misep piao ni e nim taxeak, dutou ni, moletin sav xil ha ti lisoh e hilaep te metimal e likei ni ixeih tengan moletin xil ngasen lilongeong ni.”

Ulum Ikan ni Hi Kestang

Luk 12:4-7

4 Iesu biteni mun mi xil bitene, “Nabiteni mi xamim, tua navan xil, ulimim nakan ni moletin xil ti xa likila ti lihas vin tiei namim. Vengan xa dutou ni, misakras lipol ni ti neta mun mi xamim. 5 E inou nipisen ngan xa ti ulimim ikan ni. Ulimim ikan ni Hi kestang, vengan xa melele xa bas vin moletin mat, xi nggur xeihen tengan ikila iso ni ihe Von Upang xa misakras vamat. !Reitin mak, ulimim ikan ni Hi kestang!

6 “Tuholaea xil xa latereli tang, lapos ni vahe selen lu tang e tei, e Hi en tabong ni ti tova vari. 7 Mak iaxa, munanexo ti vengan xa meulien xamim mubos mak mu mili rut tuman xil ak xa latereli tang. Ngan ak reitin mak, Hi mikila mun hilimim kekes tang xa di e vatumi.”

Munahe Unoun ni Iesu Ti

Luk 12:8-12

8 Di, Iesu biteni mi xil bitene, “Ngan xil xa di labiteni xa langgusil nou pe met moletin xil, ma Nat Moletin mun ihiteni xa xil labe nan pe met masxaxa xil na Hi. 9 E ngan xil xa labe unoun tengan laviteni xa langgusil nou pe met moletin sav xil, ma Nat Moletin mun ihe unoun tengan ihiteni xa xil labe nan pe met masxaxa xil na Hi.

10 “E ngan xil vus xa lisepin isa e his Nat Moletin, Hi ikila iketeh ihos ni xil tamu. E ngan xil xa lisepin isa e his Ninin Eo, ma Hi naketeh ti navos ni xil vari.

11 “E melele xa moletin xil lital kuvun xamim tengan lisis pilei xamim ni neta ngan pe met eilep te nim te pispisien, mu pe met eilep xil te kavmen, munanexo ti. Munanem ti nahe holu ve sepinien xil xa ti musepin ni, 12 vengan xa, e melele nen ak, Ninin Eo iaxa ipispisi ni xamim ni sepinien eah xa mukila musepin ni.”

Iesu Dei Vole Usil Unu Tei xa Holesok Nan Holu

Luk 12:13-21

13 Moletin tei e vanut moletin ak misis Iesu bitene, “Tisa, tata navan mat tuei. Hiteni mi tua navan tengan vaseti holesok xil na tamemel mi xamel.”

14 E Iesu bit rilomun ni mini bitene, “?Ei, visi iaxa miling nou tengan nilepis xamil mu niseti holesok na tamemil xa milingi di mi xamil?” 15 Di, xi biteni mi xil vus bitene, “Muvue xat xamim, muketeh kuhi xol sexien xil ngasen te hokanen. Meulien namim tave ti holesok xil te ut etan. ?Neta sav xa moletin tei holesok nan holu, e ixal rat meulien te reitinen itep? !Misakras!”

16 Di, Iesu dei vole ak mi xil bitene, “Vatei, moletin tei da, e holesok nan holu. E naho nan, anien xil xa di en holu. 17 Ma nenemien tei bemei en xa bitene, '?Nipol ni itep? E nim xil mavan, ut tovuol mun xa nileh anien savan mei naling ni vati en. 18 !Aha nakila! Inou nipol ni imak: nitalelen nim xil xa hokorong tang xiak, e ti, nipol ni rute xil xa lihe neta hu e lihe tellep. Ti, niso anien xil ak itel holesok sav navan xil iti kuhi en. 19 Imak, ma inou nite meulien tei xa bos itel holesok xil navan. Xosali iha, ti ningel kuhi, ti nianien kuhi, e ti nimun kuhi; e ti nihesi nou, vehakut.'

20 “E Hi ihiteni mini ihitene, '!Obe unu tova tang! E vongien ak tang, nihur rat meulien nam. ?Ma di, visi iaxa ileh holesok xil ak sung xa osi revi di ihe mam?'

21 “Hisit sexien ak di mistal mi ngan xil xa be hokan e di lapolu ni holesok nae xil e ut etan, e mi holesok na Hi, xi napol ni ti neta.”

Munanexo Ti Vengan xa Hi Mikila Milaxat Kuh Xamim

Luk 12:22-34

22 Di, Iesu biteni mi moletin nan xil bitene, “Mak, ma nabiteni mi xamim, munanexo ti ve meulien namim: ve naha iaxa ti mua ni, mu ve naha iaxa ti musing ni ita xol tenbemim. 23 Meulien xa Hi misa ni mi xamim bos mak mu mili anien xil xa di mungga ni; e tenbemim bos mak mu mili eising xil xa di musing xole xamim ni. 24 Mupus ti tuman xil ak, xil latalih ti naho tengan laleh anien vaxo en. Pavah mae mun tovuol tengan lasi rep xat anien ae vati en. E Hi kestang di bangan xil. E pe met Hi, xamim mubos mak mu mili tuman xil ak. 25 Nenexoen misakras vapol ni meulien na moletin tei vahe teviei luvoluv mu. 26 E vengan xa nenexoen misakras vapol ni neta xa hokorong mak e meulien namim, ma veneh iaxa di munem pupu usil holesok sav xil mun xa iemim bei?

27 Munem pisi usil hungovae xil xa di lameul. Xil di latapol ti, mu di latatil ti eising nae. E nabiteni mi xamim, suv toto Solomon te tiamu, eising nan xil tehos xa tehos; e hungovae xil ak, lasing bos mak mu mili. 28 Hi di mising xol kuh hungovae xil ak mak, xa ladi melengien tei takes, e visuvong meles, mot. Di, moletin miteas viton ni e milehi be upang. ?E xosxa ipol ni mak mi xil, ma munemi mubit Hi misakras vasing xol xamim? !Ei, neketen namim hokorong tova tang!

29 “Tavos ti xa munexo ve naha xa mua ni mu mumu ni. 30 Hisit nenexoen ak be na moletin xil xa latakil ti Hi. E Hi xa be Tamemim mikil naha xa xamim iemim bei. 31 Bos mak mu xa itiamu, ti mumae ni Hi mei ihe suv toto te meulien namim. Ti, holesok xil vus te meulien, Hi ti isa ni mun mi xamim.

32 “Munggoni sulut sipsip savan xil, ma ulimim nakan ti e munanexo ti vengan xa Tamemim memaal himetu tengan imei ihe suv toto te meulien namim e isa holesok xil vus xa di hen mi xamim. 33 Mak, ma mupos vuol ni holesok namim xil e musa vatu teni mi hoeo xil. Misak ni, Hi ipus kil sexien xil namim e iling xat huite teni e ut nesao. E rute ak, huite xil ak lisakras lavo e moletin misakras vakan ni xil. 34 Nabiteni mak vengan xa meulien namim iti sangas ni rute xa ti muling xat huit polien namim iti en.”

Moletin te Polien Xil Ti Livue Xat Xil Vengan xa Navehi Ti, Suv nae Itilomun

Luk 12:35-40

35 Iesu biteni mun mi moletin nan xil bitene, “Vehakut, muvue xat meulien namim ve naha xa imei. Ti muxoni moletin te polien xil xa di lasing xol xil ni eising te polien e di lapo laet xa di pili. 36 Moletin te polien hos xil ak ladatil suv nae xa be anien tei te tetelien e latakil ti xa itilomun vilieh. Xil livue xat xil vehakut tang ve melele xa suv nae imei e ikes xil, ma vatakes, xil likila lisah puiteh. 37 Xosxa suv ak bemei e pus moletin xil te polien nan latapat ti e dit laketeh vesi, ma ilonge ihos. Reitin li nabiteni mi xamim, moletin te polien nan xil mun lilonge ihos, vengan xa suv ak kestang imerere ni xil: xi ising ni eising te polien, ikes xil mei lianien, e xi iaxa ihengan xil. 38 Tave ti neta xos suv nae bemei e hilaep te vongien mu e makoe roroh, moletin hos te polien xil xa labue xat xil vehakut lilonge ihos.

39 “Mukil rin ak, xosxa moletin tei mikil melele xati xa moletin te kanen imei en, ma xi ivue xat xi tengan moletin te kanen ak misakras vamei e nim man. 40 Nat Moletin imei istal e melele tei xa xamim munanemi ti muvit xi vamei en. Imak, ma muvue xat xamim vehakut.”

Iesu Dei Vole Usil Hisit Moletin te Polien Lu

Luk 12:41-48

41 Di, Pita misis Iesu bitene, “Suv, di odei vole ak mi xamem xa mabe moletin nam xil kestang, mu mi moletin xil ngasen?”

42 E suv Iesu bit rilomun ni mini bitene, “Di nasepin mi hisit moletin xil xa langgoni moletin te polien xa vehakut di pol bos e be metisou. Hisit moletin ak, suv nan ilingi ihe vat te nim man melele xa xi be ut sav tei. Suv nan inesi tengan ihe vat e ilaxat moletin sav xil te polien, e tengan iseti kuh anien ae mi xil. 43 Mak, ma xosxa suv nan itilomun e ipusi xa vat te nim man di pol bos, ma vat ak ilonge ihos. 44 Reitin li nabiteni mi xamim, suv ak ipet rat vat ak ihe nesao tengan xa ti ilaxat holesok xil vus nan.

45 “E xosxa vat te nim di minemi bitene, ‘Ei, suv navan da nousav, e tamei ti mok.’ Misak ni di bas tiramue e atou sav xil te polien e nim ak, e di ngga vin xi e di mumun vuma mitallang. 46 Ma ti, suv nan itilomun e melele tei xa xi tanemi ti vahit imei en. Isak ni, suv nan mei ihas purun ni e iso rati ihe von longpangasien itel mosav xil xa latepurun naha xa teti he.

47 “Xosxa moletin te polien tei xa mikil kuh naha xa suv nan ien bei vapol ni, e tavue xat xi ti tengan vapol ni; ma suv nan ihas purun ni, e xi ilong pangas pupu ni xi ven. 48 E xosxa moletin tei te polien takil ti naha xa suv nan ien bei xi vapol ni, e di pol misa; ma suv nan ihasi ihe vuteili tang, e pangasien teni ihe hokorong tang. Ngan xil xa Hi miling holesok holu e he, Hi bit vapus holesok holu vaxo he xil. E ngan xil xa Hi miling holesok holu mu e he, Hi bit vapus holesok vahe holu mu vali vaxo he xil.”

Pispisien na Iesu Pol ni Moletin Xil Di Laletasil ra Xil Mun

Luk 12:49-53

49 Iesu biteni mi moletin nan xil mun bitene, “Inou namei tengan nasahan upang va moten ut etan. E xosxa upang ak di ngan taxeak, ma inou nimaal pupu ven. 50 Melengien tei xa nggeih di bemei e nou, e di nalong pangas nou ven, ha vuma ... melengien nen ak mei istal. 51 ?Xamim munemi mubit inou namei tengan niling tomat e ut etan? E-e, ninaling tomat ti mu. Nipol ni moletin xil ti liletasil ra xil mun tang. 52 Mak, ma taxeak iha, vatimol tei ti liti pas xil, rute xil liketeh isa ni rute xil mun venou. 53 Tata xil lisel mi horamue nae xil, e horamue xil lisel ni tame xil. Nana xil lisel ni atuli nae xil, e atuli xil lisel ni nine xil. Atou xil lisel ni havnehin xil, e xil lisel ni avu sasa nae xil.” ^{▼▼12:53 Maeka 7:6}

Moletin Xil Latalekil Ti Kout Polien na Iesu

Luk 12:54-56

54 Iesu biteni mun mi moletin xil bitene, “Melele xa mupus vatiang xa mukesi ni 'toio' ^{▼▼12:54 vatiang xa mistal e ist} miting momah xil xa maluxoluk bemei, mukila xa us vamus xiak, ma mus. 55 E melele xa mupus 'aru' ^{▼▼12:55 vatiang xa mistal e notwes} mistal mukila xa ut vavue xiak, ma ut bue. 56 !Xamim, mube vat luvosen! Melele xa mupus neta tei xa mistal e ut etan mu e tilang hat, mukil koute teni. ?E veneh sung ma ti mutapus kil ti koute te naha xa di napol ni taxeak?”

Bos xa Radi e Tomat Itel Moletin Sav Xil

Luk 12:57-59

57 Di, Iesu biteni mun mi xil bitene, “?Veneh ma di mutanem kil ti suse xa bos e momal tengan xa ti mukakao vahusili? 58 Xosxa xa moletin xa bae del xouk bit valing xouk e kot en, ma bos mak mu xa ha usepin itela tengan xa mulimal ni rin xa nggeih da xat xamil. Vengan xa xosxa otapol ni ti, ma ilinguk e he moletin te lepisien. E xi ilinguk e he polis, di, polis ilinguk e nim te xeih. 59 Nabiteni minuk, osakras ostal ra nim te xeih ak ha vuma ... uxal rerat holesok xil vus xa moletin te lepisien tehiteni.” ^{▼▼12:59 Ngan ak ixoni Hi. Mak, ma itiamu ni Melengien te Lepisien, mupol ni tomat itel Hi.}